Cymru Gysylltiedig
Cynhaliodd Rhwydwaith Ymchwilwyr Gyrfa Gynnar Cymdeithas Ddysgedig Cymru Golocwiwm 2024 ym Mhrifysgol Bangor ar 18 Mehefin 2024. Daeth y Colocwiwm ag ymchwilwyr o bob rhan o Gymru ac ystod eang o gefndiroedd disgyblaethol at ei gilydd ar gyfer diwrnod cyffrous o rwydweithio a chyfnewid gwybodaeth.
Y Colocwiwm blynyddol yw canolbwynt ein Rhwydwaith, a sefydlwyd i gryfhau’r diwylliant ymchwil yng Nghymru a chefnogi cenedlaethau’r dyfodol o ymchwilwyr i dyfu eu doniau ymchwil. Cafodd y rhaglen o weithgareddau, a oedd yn cynnwys hyfforddiant, rhwydweithio a phrofiad ymarferol, ei chyd-ddatblygu gyda’n Grŵp Cynghori ar gyfer Datblygu Ymchwilwyr a phwyllgor o lysgenhadon ymchwil o brifysgolion ar draws Cymru. Dewiswyd y thema ‘Cymru Gysylltiedig’ ar gyfer y Colocwiwm i adlewyrchu ein hymrwymiad i adeiladu rhwydwaith ymchwil cydlynol a rhyngddisgyblaethol yng Nghymru ac i gysylltu ymchwilwyr â pholisi ac ymarfer.
Dywedodd Olivia Harrison, Prif Weithredwr Cymdeithas Ddysgedig Cymru, fod thema’r Colocwiwm yn dangos “ymrwymiad i gydweithio, sy’n ganolog i wneud Cymru’n lle gwych i wneud ymchwil” a bod y Colocwiwm yn rhoi cyfle i ymchwilwyr “arddangos eu gwaith mewn digwyddiad sydd wedi’i ddylunio ar eu cyfer, ac yr un mor bwysig, sydd wedi’i lunio ganddynt.”
Uchafbwyntiau’r Rhaglen
Mae’r Colocwiwm yn llwyfan i ymchwilwyr arddangos eu gwaith, meithrin cysylltiadau â chyd-ymchwilwyr o bob cwr o Gymru a derbyn hyfforddiant wedi’i deilwra ar bynciau pwysig megis ysgrifennu grantiau, dulliau ymchwil ac effaith ymchwil.
Roedd uchafbwyntiau rhaglen Colocwiwm 2024 yn cynnwys:
- Prif araith yr Athro Enlli Thomas (FLSW) o’r enw ‘Goroesi a ffynnu: y camau i lwyddiant ymchwil’
- Gweithdai dan arweiniad ymchwilwyr (a gynhaliwyd gan aelodau’r Rhwydwaith Dr Menna Brown, Dr Felicity Healey-Benson, a Dr Tegan Brierley-Sollis).
- Sgyrsiau a gyflwynwyd gan ymchwilwyr ar sut y gall eu hymchwil wella dealltwriaeth o nodau Deddf Llesiant Cenedlaethau’r Dyfodol (Cymru) 2015. Roedd y sesiynau’n cynnwys ‘Cymru Fwy Cyfartal’, ‘Cymru Lewyrchus’, ‘Cymru Iachach’ a ‘Cymru Gydnerth’.
- Posteri ymchwil yn arddangos y gwaith ymchwil pwysig ac amrywiol sy’n cael ei wneud yng Nghymru.
- Stondinau arddangos o’r Coleg Cymraeg, Addysg a Gwella Iechyd Cymru (AaGIC) a Rhwydwaith Ymchwil Gyrfa Gynnar yr Academi Brydeinig.
- Trafodaeth panel ar ysgrifennu ceisiadau grant llwyddiannus, wedi ei gadeirio gan yr Athro Martina Feilzer FLSW (Prifysgol Bangor). Roedd y panelwyr yn cynnwys: yr Athro Shelagh Malham (Prifysgol Bangor), yr Athro Simon Hands FLSW (Prifysgol Lerpwl), Dominic Parkes (Prifysgol Abertawe), Dr Fiona Dakin (Cymdithas Ddysgedig Cymru, yn flaenorol UKRI) a Shreya Choudhury (Academi Brydeinig).
Cystadleuaeth Poster Ymchwil
Cynhaliodd y Colocwiwm gystadleuaeth boster, a noddwyd gan Rwydwaith Ymchwilwyr Gyrfa Gynnar yr Academi Brydeinig. Barnwyd y posteri gan yr Athro Raluca Radulescu FLSW (Prifysgol Bangor), yr Athro Yueng-Djern Lenn FLSW (Prifysgol Bangor), ac Isis Menteth-Wheelwright (Academi Brydeinig).
Y posteri buddugol oedd:
- Dr Giulia Bovolenta, Prifysgol Bangor, ‘Sut ydym ni’n defnyddio’r cof wrth ddysgu iaith dramor?’
- Dr Lucy Perry, Prifysgol Abertawe, ‘Archwilio Canfyddiadau o Lygredd Aer yng Nghymru: Astudiaeth Arolwg Peilot’
- Ellis Evan Jones, Prifysgol Caerdydd, ‘Darganfod triniaethau newydd ar gyfer clefydau niwrolegol gan ddefnyddio dulliau Bioffisegol a Chrisialograffig’
Diolchiadau
Hoffai Cymdeithas Ddysgedig Cymru ddiolch i bawb a helpodd i wneud y Colocwiwm yn llwyddiant; gan gynnwys Prifysgol Bangor a’r staff, Pwyllgor y Colocwiwm ac aelodau’r grŵp Cynghori, a phawb a fynychodd y digwyddiad ac a gyflwynodd yn ystod y dydd.
Os oes gennych unrhyw gwestiynau am y Colocwiwm ECR neu os oes gennych ddiddordeb mewn bod yn rhan o Bwyllgor y Colocwiwm ar gyfer 2025, anfonwch e-bost atom yn researcherdevelopment@lsw.wales.ac.uk.
